Ser auga, darse en auga. Medio século: 1958-2008. Unha antoloxía de Bernardino Graña

Son lector devoto da poesía de Bernardino Graña, cuxo segundo apelido é Villar, coma min, malia non termos ningún parentesco. De feito, o seu compañeiro de xeración Manuel María sempre chamaba Villar ao Bernardino, nunca facía uso do seu nome nin do seu primeiro apelido. Ese pracer lector levoume a propoñerlle ao PEN Clube de Galicia a publicación dunha antoloxía, pois Bernardino xa publicara tres libros desde Ardentía. Obra poética completa (Espiral Maior, 1995) compilada para a homenaxe que lle tributou a Asociación Cultural Monte Branco de O Couto (Ponteceso). A proposta foi aceptada e preparei unha antoloxía, que parafraseando un verso seu intitulei Ser auga, darse en auga. Medio século: 1958-2008 e que conta cun estudo introdutorio de 60 páxinas. A aparición do volume foi nova aquí e acolá, porén, a primeira recensión publicouna Ramón Nicolás nas páxinas do suplemento “Culturas” de La Voz de Galicia o 16 de abril de 2011, baixo o título de “Cincuenta anos de poesía” e esta recollida aquí, no seu blogue Caderno da crítica.
Agora estou a ler o último número da revista Grial e na súa sección “O espello das letras” o poeta Xosé María Álvarez Cáccamo asina outra da que recupero neste espazo un fragmento:
(…) Chega a nós agora o balance antolóxico de cincuenta anos de escrita poética de Bernardino Graña, Ser auga, darse en auga. Medio século: 1958-2008, enmarcados entre o xuvenil Poema do home que quixo vivir e a recompilación de inéditos e dispersos que conforma Acendede as almenaras. Encargouse da selección textual e dos labores de estudo e edición o poeta Miro Villar, quen realizou unha escolma moi atinada, coa mostra dos mellores logros da voz do autor de Cangas do Morrazo (…)