Patente de corso, de Rafa Vilar, VI Premio Arume de Poesía para Nenos da Fundación Neira Vilas

(Fotografía do voceiro sindical Avantar, da CIG. Premer na imaxe para agrandar o tamaño)
Parabéns para o meu irmán Rafa Vilar (que galeguizou o apelido cando naceu súa filla Claudia) xa que vén de gañar o VI Premio Arume de Poesía para Nenos, que convoca a Fundación Neira Vilas e que está dotado con 1.000 euros e a publicación do libro. Rafa presentou a obra Patente de corso (pequeno dicionario pirata), que está estruturada en estrofas de dous a catro versos, e na opinión do xurado versifica unha historia de “piratas bos, xoguetóns e atractivos para o público infantil. Non son corsarios violentos, senón máis ben inxenuos, que incluso esquecen cargar os canóns para librar así batallas nas que ninguén resulta ferido”. Formaron ese xurado o propio Xosé Neira Vilas; o lingüísta Valentín García Gómez, Xoán Andrés Fernández Castro e Luis Reimóndez Fernández. Alén diso tamén salientaron que “o autor logra imprimir un ritmo rápido e un estilo lixeiro, mais non por iso baleiro de contido, pois hai referencias ao pirata galego Benito Soto, a Os camiños da vida de Otero Pedrayo e incluso á Internacional“. Outro aspecto a salientar é a mestura de termos tradicionais cos propios dos piratas, de xeito que se consegue un ambiente literario tanto lúdico como apacible. En declaracións á edición do Deza do Faro de Vigo (absurdamente traducidas ao castelán e que nós retornamos á lingua orixinal) Rafa sinalou que a poesía é, sen dúbida, “un xénero moi creativo para o público mozo”. Para escribir Patente de corso (pequeno dicionario pirata), tivo como fonte de inspiración o mundo dos corsarios, mais tamén as súas propias lembranzas de cando era neno e o mar próximo á localidade natal de Cee. E todo, “adubado cun poco de humor”.
O xuri do premio Arume tamén fixo dúas mencións de honra, para Verdedades, da poeta Yolanda Castaño e Flores de Abruñeiros, de Alberto Calvín Corredoira.
Non é a primeira vez que meu irmán Rafa transita os territorios da poesía infantil, xa que ten publicado o libro Acuarelas, con ilustracións de Kristina Sabaité, que editou Galaxia en 2009 e que xa fora finalista dunha edición do premio Merlín. Velaquí un dos poemas de Acuarelas.
desde arriba
as casas son un mundo de tellas brillantes
e chemineas grises
 
a miña
ten fiestras orientadas ao sol
e un balcón
onde nunca nunca xogamos
 
a miña casa
ten chaves escondidas
e un segredo durmido
do tempo dos bisavós
 
outras casas teñen forma de espeto
cravadas no medio do cemento
como luces que faíscan
 
un día houbo unha horta
e arboriñas froiteiras
e unha cancela que non pechaba
 
houbo un camiño ao lavadoiro
e máis cousas que contan na casa
cousas que
como as pompas de xabrón que hoxe
ceibo
fan plop plop