No Mercado Ecolóxico de Quilmas (Carnota)

(Video de ANT Televisión)
Este sábado 13 de agosto fomos até o Mercado Ecolóxico pola Defensa da Terra, que organiza a Cooperativa Raínha Lupa de Quilmas (Carnota). Naceu contra a ampliación dunha piscifactoría de Stolt Sea Farm e conta coa participación de varios expositores con produtos de alimentación, apicultura, artesanía, comercio xusto…, como mostra do compromiso co territorio e como apoio a formas de producir respectuosas co medio ambiente e as persoas. Aló estivemos, aínda que só pola mañá e baixo unha orballeira, para “feirar” algunha cousa neste mercado que se vén celebrando de xeito periódico, aínda que a nosa era a primeira visita e prometemos voltar. Unha ducia de postos de produtores/as e artesáns, entre os que salientamos o da propia Cooperativa de Agricultura Ecolóxica Raínha Lupa, con produtos da horta ecolóxica, conservas ou mel da Comunidade de Montes de Caldebarcos e San Cibrán (Carnota). Había outros postos con empanadas, pan de millo e repostaría ecolóxica, tamén queixos, polbo desde O Carballiño, Equisol, tenda de Comercio Xusto de Compostela, a cervexa artesá de Menduíña (Cangas do Morrazo), a quen lle levamos unha caixa variada, e outros postos variados, alén da mesa informativa da Asociación Monte Pindo Parque Natural, aos que lle mercamos a camisola co carballo anano. A xornada continuaba xa pola tarde e na mañá do domingo, mais nós tiñamos outros compromisos.
Alén de “feirar” tivemos ocasión de conversar con amigas e amigos que aló atopamos, como a poeta e xornalista Xandra Tedín, que pertencera ao Batallón Literario da Costa da Morte.
Quilmas é un territorio da miña mocidade e tamén un territorio literario que eu sempre lembrarei polo relato “A mariñeira de Quilmas” pertencente ao libro Vidas senlleiras do escritor Darío Xoán Cabana e que se pode ler completo aquí. Outro poeta, Antón Dobao, baseándose nese relato, rodou para a CRTVG a telemovie “A mariñeira” (Premio Mestre Mateo 2009 á Mellor Película para Televisión e Premio á Mellor Actriz a Camila Bossa no Bragacine 2010, Festival Internacional de Cine Independiente de Braga), cuxo argumento narra como María, Pandullo e a súa filla Rosa viven pracidamente nunha vila da costa galega, Quilmas. Na compaña dos seus amigos Patrocinio e Modesto, agardan a súa segunda filla, Federica. O mar e a terra dispénsanlle o que precisan os seus corpos e a República, o Estatuto e os libros o que a súa alma devece. Nin no seu peor soño imaxinaban o que en poucos días ocorrería. Un desenlace que nós agora non imos desvelar. A película tivo como localizacións exteriores os lugares de Quilmas, O Pindo, Carnota, Corcubión, Berdeogas (Dumbría) e Quintáns (Muxía). Aquí tedes o seu tráiler.