«Paisaxe vermella», un poema para un cadro de José S. Carralero

PaisaxeVermella02
PaisaxeVermella01
(Premer nas imaxes para agrandar o tamaño)
Por volta de finais do 2009 recibín un convite do poeta peruano, enraizado en Salamanca, Alfredo Pérez Alencart para participar nun volume colectivo de homenaxe ao pintor José S. Carralero (Cacabelos, León, 1942), no que cada poeta participante debía escribir un texto baseado nun cadro do pintor que nos fora facilitado con anterioridade nunha imaxe fotográfica.
O proxecto tomou corpo e o libro publicouse co título El paisaje prometido (Sesenta y ocho poetas del mundo para un pintor de Castilla y León) José S. Carralero. Idea y edición de Alfredo Pérez Alencart (Salamanca: Sociedad de Estudios Literarios y Humanísticos de Salamanca – Selih, 2010) e a ampla nómina de poetas foi a seguinte:
Tundidor, Morejón, Tamura, Fonseca, Graça Moura, González Tosar, Colinas, Salvado, Cho Seung-hui, Amat, Quintanilla Buey, Valinho Alvarez, Ancet, González Vigil, Arrieta, Rodríguez, Churm, López Samprón, Armas, Miguel Elías, González-Guerrero, Ledesma, López Anglada, Mendoza, García López, Montes, Galán, José A. Pérez, Cilloniz, García-Camino, Martins, Villagrasa, Tarquis, Mata, Frayle Delgado, Galeano, Pavón, Velasco Plaza, Tanarro, Duarte-Herrera, Verde, Funes, Maurial, Wolf, Mario Alonso, Nejar, Alvarado Tenorio, Manhitu, Aguilar Carrillo, Viloria, Bajrat, Gatica, Acosta, Rauskin, Miro Villar, Serrano, Alonso Requejo, Muñoz Quirós, Sagüillo, Becher, Aganzo, Arancibia, Osório, Greenwald, Palomares, Mamani, Abdul Hadi Sadoun e A. P. Alencart.
Da parte galega só dúas voces, Luís González Tosar co poema «Chauen, el primer gozo» (do que ignoro a razón de aparecer unicamente na versión en castelán) e eu propio con «Paisaxe vermella», un soneto en lingua galega, que acompañei dunha versión ao castelán, baseada no cadro da imaxe superior, intitulado Paisaje rojo, 1977 (Óleo sobre lienzo. 97×130 cms.) Medalla de Oro de la IV Bienal de Pintura Ciudad de Huesca, 1980.
Desde datas recentes o sitio web crear en Salamanca ou a propia páxina persoal do pintor José S. Corralero permiten descargar de balde en pdf todo o volume, do que agora reproduzo o meu texto:
PAISAXE VERMELLA
Cando por primavera venza Amor,
renacendo do inverno fuxidío,
no sangue notarás un calafrío
co que se apaga o último tremor.
Cando por primavera arda a calor,
anunciando un verán de moito brío
nos labios notarás ese arrepío
co que se acende o corpo na suor.
Cando por primavera todo naza
de novo, notarás que se consome
a saudade, que esqueces o seu nome.
Cando por primavera todo agrome
de novo, notarás como esguedella
o silenzo paisaxe en cor vermella.
PAISAJE ROJO
Cuando por primavera venza Amor,
renaciendo del invierno huidizo,
en la sangre notarás un escalofrío
con el que se apaga el último temblor.
Cuando por primavera arda el calor,
anunciando un verano de mucho brío
en los labios notarás ese estremecerse
con el que se enciende el cuerpo con el sudor.
Cuando por primavera todo nazca
de nuevo, notarás que se consume
la nostalgia, que olvidas su nombre.
Cuando por primavera todo brote
de nuevo, notarás cómo se despeluza
el silencio paisaje en color rojizo.
(Tradución do autor)

Esta entrada foi publicada en Antoloxías, Arte, Poesía, Versións ou traducións. Garda a ligazón permanente.