Cincuenta aniversario do Día das Letras Galegas 1963 – 2012. Cincuenta carteis. Cincuenta deseñadores. Cincuenta escritores

(Fragmento do cartaz de homenaxe a Gonzalo López Abente)
A Real Academia Galega (RAG) celebra a conmemoración do 50 aniversario do Día das Letras Galegas con varias propostas, coma este libro ou a xa recollida nesta bitácora.
Outro dos proxectos denominouse Cincuenta aniversario do Día das Letras Galegas 1963 – 2012. Cincuenta carteis. Cincuenta deseñadores. Cincuenta escritores (que se pode descargar aquí na páxina da Academia). Coa Real Academia Galega (RAG) colaboraron a Asociación Galega de Deseñadores (DAG), a Asociación de Escritores e Escritoras en Lingua Galega (AELG), a Asociación de Empresarios de Artes Gráficas de Galicia (AEAGG), a empresa Torras Papel / Norte Papel, a Asociación Galega de Editores (AGE), a Federación de Libreiros de Galicia, a Asociación Profesional de Bibliotecarios Municipais de Galicia, Anabad – Galicia, o xornal Faro de Vigo, que distribuíu a publicación de balde, e a Consellaría de Cultura, Educación e Ordenación Universitaria da Xunta de Galicia.
Son 50 cartaces dedicados a cadanseu autor ou autora, que abranguen desde 1963 (Rosalía de Castro) até 2012 inclusive (Valentín Paz Andrade), asinados por outros tantos deseñadores e deseñadoras galegas e tamén con medio cento de brevísimos textos escritos ad hoc por autoras e autores de todas as promocións literarias vixentes.
Alén da publicación, onte, Día das Letras Galegas, no xornal Faro de Vigo, a maiores fíxose outra edición de mil exemplares que está a ser repartida por colexios e bibliotecas de todo o país por conta da Asociación Galega de Editores.
Colaborei nesta díficil angueira de sintetizar o perfil dun autor ou autora en escasos caracteres, pois a AELG pediume que me ocupase da figura de Gonzalo López Abente e elaborei un textiño que xoga a xuntar os títulos de catro das súas obras: Escumas da Ribeira (s. d., 1914?), Do outono (1924), Centileos nas ondas (1958) e o poemario que deixara inédito Bretemada (2011), escrito entre 1917 e 1922. Con ese xogo de palabras pretendín salientar o seu carácter de poeta atlántico e do mar, tal e coma o definira Vicente Risco.
Na bretemada do outono
os centileos nas ondas
e as escumas da ribeira.
De por parte, a ilustración do cartaz de homenaxe a Gonzalo López Abente, cuxo pdf pode descargarse aquí, corresponde ao deseñador José Antonio Pérez Gil.