Antón Zapata García, o poeta de Laxe (I)

A poesía galega de Antón Zapata García. Edición e estudo foi o título da miña tese de doutoramento de 1600 páxinas, dirixida polo profesor Xesús Alonso Montero. A raíz dese inmenso labor de rescate veño divulgando diversos traballos sobre o poeta. En 2008 publiquei o artigo “Rosalía de Castro na obra de Antón Zapata García” no número 3 da Revista de Estudos Rosalianos (pp. 173-197), que se pode ler aquí. Realizo unha análise da presenza de Rosalía na súa obra, despois dunha breve nota biográfica do poeta de Laxe. O estudo céntrase en dous poemas aparecidos en revistas da emigración bonaerense: “A Rosalía de Castro” en Suevia (1913) e “Rosalía de Castro” en Compostela (1941-1944) e Galicia (1952) [versión incluída no libro A Roseira da Soidade (1954), cuxa edición facsimilar editaron Xerais e o Concello de Laxe]. Alén diso anoto a pegada rosaliá noutros fragmentos de poemas e nos diferentes actos públicos do poeta na colectividade galega, así como na prosa en castelán e no epistolario co fotógrafo José Vidal García en 1935 ou Xosé Filgueira Valverde en 1936. Finalmente, un anexo compila os poemas onde aparece Rosalía.