Dous videos do Seminario de Estudos Comarcais


Nos últimos tempos e para publicitar as novidades literarias puxéronse de moda os denominados “booktrailers” (a web de Xerais fai bastante uso deste recurso). Como tales pódense considerar tamén dous videos relacionados coa Costa da Morte que podemos atopar no portal culturagalega.org, do Consello da Cultura Galega, nos que se publicitan dúas das últimas publicacións do Seminario de Estudos Comarcais (Semescom). A locución e o guión son do antropólogo muxián Manuel Vilar no primeiro dos videos, “Faros da Costa da Morte“, cuxa ficha podemos ler aquí, e que fai un percorrido polos faros e sinais marítimos deste litoral do Occidente galego, desde as Illas Sisargas ao Monte Louro, pasando por Punta Nariga, o Roncudo de Corme, a Insua de Laxe, o Vilán de Camariñas, Muxía, Touriñán, Fisterra, Cee, as Illas Lobeiras e a Insua de Lariño. Do punto de vista literario cítase a obra de Labarta Pose e a poesía de Xervasio Paz Lestón e Gonzalo López Abente, do que o poeta fisterrán Alexandre Nerium recita o poema “O Vilán”. E ao falar de Fisterra, Manuel Vilar cita uns versos dun soneto meu, aparece un fragmento da novela “A vaca de Fisterra e a trabe de alcatrán” de Marilar Aleixandre e o propio Nerium le un poema da súa autoría.
Velaquí completo o meu soneto:
Que lonxe fica o mundo desde o faro Fisterra
para nós que aprendemos de terras coñecidas,
non pode ser estraño que onde o mar ceifa vidas
no preludio dos tempos fora alma e fin da terra.
Cando nós mesmos temos un vértigo que aferra
as nosas epidermes en cada acometida,
as naos na tempestade son cabalos sen brida
tendo un desequilibrio que oprime veas e aterra.
E os poboadores de antes iluminando o Facho,
con traidor lume aceso nun círculo pedroso
escribindo coas luces historias de naufraxios.
Non mais que era quimera facer da fame empacho
en épocas gañadas pola peste en acoso
e coas trobas tinguidas de funestos adaxios.

As imaxes de Santiago nas igrexas e santuarios da Costa da Morte”, cuxa ficha podemos ler aquí, coa dirección e o guión de Xosé María Lema Suárez, presidente do Semescom, e do propio Manuel Vilar, quen fai de peregrino que nos presenta unha variedade de iconografía xacobea. Non só as mostras máis divulgadas do Santiago ecuestre e peregrino, senón outras singulares como a da Barca de Muxía, co apóstolo axeonllado ao pé da barca na que vén a Virxe, ou a de Cereixo, que representa a traslación en barca do corpo de Santiago de Palestina a Galicia (a Translatio Beati Iacobi). Ambas e dúas producións do Seminario de Estudos Comarcais foron realizadas grazas ao Proxecto Singular “Percorrendo Vieiros da Costa da Morte” da Deputación da Coruña. Os videos pódense ollar só con premer na ligazón dos seus respectivos títulos.

Esta entrada foi publicada en Arte, Fotografía, Historia, Lendas e mitos, Narrativa, Poesía, Presentacións, Roteiros. Garda a ligazón permanente.