Gonzalo López Abente "resucitou" na XLI Feira do Libro da Coruña

Aconteceu na XLI Feira do Libro da Coruña e soubémolo por un “chío” ou “tuit” na conta twitter de @bretemas (do editor Manuel Bragado), quen “retuiteaba” a información desde @ErmitasValencia, a conta de Ermitas Valencia Romar (vencellada á Costa da Morte, pois naceu en Muxía en 1977), concelleira nacionalista da Coruña. O escritor muxián Gonzalo López Abente (1878-1963) “resucitou” no programa da devandita Feira, como testemuña a reprodución gráfica, que en principio atribuímos a un xornalista aínda en prácticas do diario coruñés La Opinión. Mais o erro provén do propio programa que se publicou, onde se pode ler:
(Día 4 de agosto, sábado)
21.15. Presentación do libro A narrativa mariña, de Gonzalo López Abente, publicado por Edicións Xerais de Galicia. Xunto co autor, participan no acto Suso Sambade, X.H. Rivadulla Corcón e Manuel Bragado.
Resulta obvio asegurar que Gonzalo López Abente non estivo de corpo presente aínda que o seu espírito acompañou as palabras de todos tres presentadores do libro perante unha concorrencia pouco numerosa mais abondo interesada na obra narrativa do autor muxián.