#17demaioDiadasLetrasGalegas Sorteo de dous exemplares asinados do poemario Gameleiros, con fotografías de Manuel Álvarez

Esta bitácora non vai celebrar a figura de Xosé Fernando Filgueira Valverde (cuxa biografía é ocultada parcialmente na páxina da súa Fundación)  no próximo 17 de maio, Día das Letras Galegas, e vaise sumar a aquelas entidades e persoas que lembrarán o incómodo (para algúns) pasado de filiación franquista do homenaxeado.
Máis unha vez, como promoción da lectura na nosa lingua (que ben a precisa), contra a crise económica (que o é tamén do libro e que non desapareceu como queren facernos crer), vou realizar un sorteo de dous exemplares asinados do poemario Gameleiros (2002), con fotografías de Manuel Álvarez, en fermosa edición xa descatalogada por Xerais.
BASES
O sorteo é internacional. Poderán participar persoas de todo o mundo que teñan interese pola literatura en lingua galega.
Pregunta
Para participar cómpre dar axeitada resposta a unha sinxela pregunta. Antes recoméndavos a lectura do artigo «A RAG homenaxea un franquista» publicado polo profesor e crítico Manuel Rodríguez Alonso na súa bitácora Bouvard e Pécuchet.
Cal dos seguintes episodios non forma parte da biografía de Xosé Fernando Filgueira Valverde?
a) Foi unha das grandes figuras da escindida do PG, Dereita Galeguista.
b) Testemuñou a prol de Alexandre Bóveda no xuízo que o condenou a morte.
c) Colabora cando está de catedrático no instituto de Lugo como censor-expurgador das bibliotecas públicas e docentes da provincia.
d) Formou parte do novo grupo dirixente na provincia de Pontevedra, realizando uns incendiarios discursos e panexíricos dos sublevados en Radio Pontevedra.
e) Foi membro dos comités de represión do profesorado na provincia de Pontevedra.
f) Foi procurador en Cortes.
g) Foi alcalde de Pontevedra entre 1959-1968.
Resposta
As respostas deben enviarse como comentario na propia anotación do blogue crebas.gal,
nun chío coa palabra-chave ou hashtag #Filgueirafranquista
ou nunha mensaxe directa dirixida á conta de twitter @MiroVillar indicando un enderezo de contacto.
Premios
Dous exemplares asinados do poemario Gameleiros, con fotografías do guardés Manuel Álvarez, sorteados entre todas as respostas que atinen, que levará a sinatura do autor e unha agarimosa dedicatoria especial para a persoa que os gañadores ou as gañadoras sinalen.
Prazo
Desde hoxe mesmo até as 23:59 do dezaseis de maio do 2015. Boa sorte!